Нітка маршрута

       Пачынаецца наша экскурсія са знаёмства з касцёлам нараджэння Найсвяцейшай Дзевы Марыі ў вёсцы Зарачанка (раней Баля Касцельная). Касцёл пабудаваны ў 1937 годзе ў постнеагатычным стылі і з’яўляецца візітнай карткай вёскі.

     Далей маршрут падарожжа вядзе ў вёску Лойкі, дзе знаходзіцца рытуальны помнік. Гісторыя гэтага помніка здзівіць кожнага. Яшчэ адным з  цікавых архітэктурных помнікаў у гэтай вёсцы з’яўляецца будынак гміны, які пабудаваны ў стылі польскага мадэрна. У перыяд Вялікай Айчыннай вайны ў будынку размяшчалася нямецкая камендатура. Пазней – школа, затым амбулаторыя і аптэка. Гэта адна з чатырох гмінаў, якая засталася на тэрыторыі БССР.

У рамках турыстычнага маршруту па месцах Вялікай Айчыннай вайны прапануем наведаць музейны пакой воінскай Доблесці, Подзвігу і Славы, брацкую магілу ў вёсцы Шэмбелеўцы, ушанаваць памяць загінуўшых воінаў мінутай маўчання.

    Наша вандроўка працягваецца па вёсцы Белыя Балоты, дзе вы даведаецеся пра гісторыю гаспадарскіх сядзіб сям’і Сабалеўскіх і Тукала. Прагуляецеся па парку, які некалі славіўся сваімі экзатычнымі раслінамі.

      Наступны прыпынак – касцёл Прэабражэння Гасподняга ў в. Селіванаўцы. Пабудаваны касцёл ў 1899 годзе ў стылі неакласіцізму. Будаўніцтва касцёла інвестыравала пані Сабалеўская. Касцёл заненсены ў Дзяржаўны спіс гісторыка-культурных каштоўнасцей Рэспублікі Беларусь.

      Напрыканцы экскурсіі вы завітаеце ў школьны краязнаўчы народны музей “Вытокі”. У інтэр’еры беларускай хаты дзяўчаты-беларусачкі акунуць вас у сялянскі быт, пазнаёмяць з калекцыяй ручнікоў з бабулінага куфра, раскажуць пра гісторыю сядзіб Валовічаў і Гурскіх.